Sen dúbida, esta é a referencia por excelencia do lecer infantil. Trátase dun singular parque que destaca por contar con diferentes xogos que chamarán a atención dos teus peques: unha pequena aldea de casiñas en torno a unha praza, varias casas nas árbores, un castelo con randeeiras e tobogán incorporados, ademais dun avión onde imaxinar que sobrevoan o Mar de Santiago ou un autobús ao máis puro estilo londinense para viaxar ás distintas parroquias do municipio.

Como colofón a todo isto, hai un pequeno tren, ao que se pode subir de modo gratuíto -cun máximo de 5 voltas por menor-, que seguro que lles encantará. E para rematar, un carrusel que se move cunha manivela, ao que se poden subir tamén gratis.

Moi preto deste espazo -ao lado da Avenida de O Recheo-, hai outro parque tradicional, recentemente renovado, e que dispón de diverso tipo de xogos. Poderedes variar de parques non só dentro do propio casco urbano, senón tamén noutras parroquias.